Ammore Amaro

Amore Amaro Amaro Ammore
Passione ca schiatta 
'e tunsille e nun respire
Anema prena 'e cravune 'e fuoco
Ca sgrava diavule e canzone a sentimento

Amore Amaro larva azzeccosa
M'hê cucinate a purpetielle aneme e core
Brore cucente pe dint' 'e vvene
T' 'o zuche a surzo e te ne futte r' 'e canzone...

Ammore mio
va vattenne
I' 'a cca nun me movo
Tu va i' me resto a durmì
Frienne magnanne è passato 'nat'anno
..e 'nat'anno passarà
Maronna da neve
Tu si' marmo jacciato
Pecché m'hê grazziato
E nun me fai murì

Sta cagnanno 'o tiempo porta tempesta
E 'o fridde 'ncuollo già m'o sento rint' all'ossa
Porta bufera o fra' e pe' tutta 'a notte
Chist'uocchie miei chiovene lacreme lucente

Amore Amaro Amaro Ammore
Me sfunne 'e rine senza 'nu felillo r'uoglio 
Cumpagno d'o mio stai cca'notte e juorno 
E 'o ssai ca si nun te ne vaie
me ne vach'io...

Ammore mio va vattenne
I' ccà facce 'e vierme
Tu va i' me metto a durmì
Frienno magnanno 
è passato 'nat'anno
..e ‘nat'anno nun passarà
Maronna d'a neve
N'hê fatte cazzate 
Pecché m'hê grazziato
Pe' nun farmi murì
Maronna busciarda
tu m’hê abbandonato
Cu te m’hê pigliato
Pe’ farme murì.

Testo di Canio Loguercio - Musica di Canio Loguercio e Rocco De Rosa
Registrazione e Missaggio: Paolo Modugno c/o O.A.S.I. Studio, Roma
Canio Loguercio: Voce, chitarre, ritmica, programmazione
Rocco De Rosa: Pianoforte, tastiere